انقرہ۔22دسمبر (اے پی پی):پاکستان تے ترکیہ وچال سفارتی تعلقات دے قیام دی 75 ویں سالگرہ دی مناسبت نال انقرہ اچ پاکستانی سفارتخانے دی طرفوں ترکیہ دی وزارت خارجہ، ترکیہ دی وزارت ثقافت و سیاحت اتے پاکستان انٹرنیشنل ایئرلائنز دے اشتراک نال ھک ثقافتی نائٹ دا اہتمام کیتا ڳئے ۔ تقریب دے مہمان خصوصی پاکستان ترکیہ پارلیمانی فرینڈ شپ گروپ دے چیئرمین علی سا ہین ہن۔ گورنر انقرہ واسپ ساہن، اراکین پارلیمنٹ، معززین، سفارتی برادری اتے میڈیا دے نمائندے تے پاکستانی کمیونٹی وݙی تعداد اچ شرکت کیتی ۔تقریب توں خطاب کریندے ہوئیں ترکیہ پارلیمنٹ دے علی ساہین آکھیے اساں بھرپی تے یکجہتی دی ثقافت توں ملݨ آلی طاقت دے نال اپݨے تعلقات کوں مضبوط بݨاوݨ دیاں کوششاں جاری رکھیسوں ۔ انہاں مزید آکھیے پاکستان اتے ترکیہ بھرپی دا وکھرا رشتہ رکھیندن کیوں جو ترکیہ دا ہر ٻال پاکستان نال محبت نال ڄمدے تے ہر پاکستانی ٻال ترکیہ نال محبت نال ڄمدے ۔ترکیہ اچ پاکستان دے سفیر یوسف جنید خطاب کریندے ہوئیں آکھیے جو ݙوہیں بھرا ریاستاں وچال تعلقات 75 سال پراݨے ہن جݙاں جو ݙوہیں ملکاں وچال تعلقات جمہوریہ دے قیام توں وی اڳوں ودھدن ۔وزیر اعظم محمد شہباز شریف اتے ترکیہ دے صدر طیب اردوان دی طرفوں اڄوکے سال دے شروع اچ انقرہ اچ پاکستان ترکیہ سفارتی تعلقات دے 75 سال پورے تھیوݨ دی یاد اچ مشترکہ لوگو دے افتتاح دا حوالہ ݙیندے ہوئیں پاکستانی سفیرایں ڳالھ تے زور ݙتے جو ݙوہیں ملکاں ثقافتی نائٹ دا اہتمام کر تے ایں سنگ میل کوں چنڳے طریقے نال منائے ۔تقریب دا آغاز پاکستان اتے ترکیہ دے قومی ترانے توں تھیا ایں توں بعد ترکیہ دے موسیقاراں تے طلباء پاکستانی ملی نغمہ ’’دل دل پاکستان‘‘ ڳایا۔ بعد اچ روایتی کپڑیں اچ قوالاں ابو محمد اتے ابو فرید ایاز مولانا رومی، امیر خسرو دے شعر تے بابا فرید دا کلام پیش کیتا۔ ھک ݙینھ پہلے استنبول اچ وی کلچرل نائٹ دا اہتمام کیتا ڳیا ہئی جیں اچ ترکیہ دے موسیقار، ترکیہ دے گلوکار ایرسین فائقزادے اتے قوال ابو محمد اتے ابو فرید ایاز شرکت کیتی۔
