امید ہے افغان حکومت ان وجوہات دے تدارک سانگے سارے ضروری اقدامات کریسی جیں اچ اے قدم چاتاگیا ہئی ،وزیراعظم
اسلام آباد ۔ 20 مارچ (اے پی پی) وزیراعظم محمد نواز شریف پاکستان ۔ افغانستان سرحد کوں کھولنڑ تے وختی احکامات جاری کر ڈتے ہن ۔ وزیراعظم آفس دے میڈیا ونگ ولوں سنوار کوں جاری بیان دے مطابق وزیراعظم آکھیا جو باوجود ایں امر دے جو اجوکے ڈینہاں اچ پاکستان اچ تھیونڑ آلے دہشت گردی دے واقعات دے تانے بانے افغان سرزمین تے موجود پاکستان دشمن عناصر نال ونج ملدے ہن ، اساں سمجھدوں جو ڈوہیں ملکاں وچال صدیاں دے مذہبی، ثقافتی اتے تاریخی رابطے اتے تعلق دے پیش نظر سرحداں دا ودھ دیر تئیں بند رہنڑ عوامی اتے معاشی مفادات دے منافی ہے چنانچہ اساں اے فیصلہ کیتا ہے جو خیرسگالی دے جذبے دے تحت اے سرحداں وختی طور تے کھول ڈتیاں ونجن ۔ وزیراعظم آکھیا جو اساں امید کریندوں جو جیرھیاں وجوہات دی بنا تے اے قدم چا تا گیا ہئی ، ایندے تدارک سانگے افغانستان حکومت سارے ضروری اقدامات کریسی۔ انہاں آکھیا جو اساں کئی واری ایں عزم دا اعادہ کیتا ہے جو پاکستان اچ امن و سلامتی سانگے افغانستان اچ دیرپا امن ناگزیر ہے تے اساں ڈوہیں ملکاں اچ دہشت گردی دے پورے خاتمے سانگے افغان حکومت نال تعاون دیاں پالیسیاں تے عمل جاری رکھیسوں ۔
