جعفر آباد۔28اگست(اے پی پی)وزیراعظم محمد شہباز شریف سیلاب اتے ابرشاں پاروں تھیوݨ آلی صورتحال نال نمتݨ اتے سیلاب متاثرین دی امداد و بحالی کیتے صوبہ بلوچستان کوں 10 ارب روپے ݙیوݨ دا اعلان کیتے۔ اے اعلان انہاں بلوچستان دے سیلاب متاثرہ علاقیاں دے دورے ویلھے کیتے۔ وزیراعظم آکھیے جو میں اڳیں کݙاھیں اینڄھا سیلاب نی ݙٹھا، اے ٻہوں وفی تباہی اے جئیں چارے صوبیاں کوں اپݨی ولھیٹ اچ ڳھن ڳھدے، ساکوں موسمیاتی تبدیلی دے اثرات مکاوݨ کیتے عملی اقدامات کرݨے ہوسن، متاثرین سیلاب دی بحالی کیتے سخت محنت کرݨی ہوسی، ایں سانڳے ٻئے ملکاں دی تکنیکی معاونت دی لوڑھ ہوسی، اڳو ت?? قدرتی آفات دی تباہ کاریاں تے قابو پاوݨ کیتے سرمایہ کاری کرݨی ہوسی۔ وزیراعظم آکھیا جو کوڑے بیانات اتے نعریاں نال کڄھ نی تھیوݨا جے تئیں عملی کم نا کر ݙکھاوݨ، میں پچھلے 73 سال اچ پاکستان دے اپݨے پیریں تے کھڑا نا تھیوݨ دے بیانات کوں مسترد کرینداں۔
