اسلام آباد۔4 اکتوبر (اے پی پی) پی آئی اے اپݨے برطانوی آپریشن دا باضابطہ اعلان کر ݙتے، جیندا آغاز 25 اکتوبر توں تھیسی۔ ترجمان دی طرفوں جاری بیان موجب پی آئی اے پہلے مرحلے وچ اسلام آباد توں مانچسٹر کیتے ہفتہ وار ݙو پروازاں آپریٹ کریسی۔ پروازاں ہفتے تے منڳل دے ݙینھ آپریٹ تھیسن۔ اسلام آباد توں شیڈول موجب پی آئی اے دی پرواز 12 وڄے روانہ تھیسی تے شام 5 وڄے مانچسٹر پڄسی۔ مانچسٹر توں پرواز شام 7 وڄے روانہ تھیسی تے سویلے7 وڄے اسلام آباد پڄسی۔ مانچسٹر دی پروازاں وچ بتدریج ودھارا کیتا ویسی تے ݙوجھے مرحلے وچ لندن دی پروازاں وی شروع کیتیاں ویسن، پروازاں دی بکنگ کھول ݙتی ڳئی اے جیندا کرایہ ٻہوں مناسب اے، ہݨ اساݙے ہم وطن 15 گھنٹے دی مسافت دی بجائے صرف 8 گھنٹے وچ اپݨی منزل تے پڄ ویسن۔ ترجمان پی آئی اے ݙسائے جو 5 سال دے عرصے دے بعد پی آئی اے ولدا ایں روٹ کوں شروع کرݨ تے ٻہوں پرجوش اے، اساݙا نصب العین اے جو اساں مسافریں کوں ٻہوں آرام آلا تے ساریاں سہولتاں نال مزین سفری سہولتاں ݙیسوں۔
