نیویارک۔25ستمبر (اے پی پی) نائب وزیراعظم تے وزیر خارجہ سینیٹر محمد اسحاق ڈار نیویارک اچ پاکستان دے تاریخی قونصلیٹ جنرل اچ قونصلر سروسز ایریا دا افتتاح کیتا ۔ اے قونصلر سروسز ایریا 1948 اچ قائم کیتا ڳیا ہئی اتے ایں دی رینوویشن حال اچ مکمل تھئی اے۔ خمیس کوں دفتر خارجہ موجب، ایں موقع تے خطاب کریندیں ہوئیں نائب وزیراعظم آکھیا جو ملک توں باہر پاکستانی مشن دی پہلی ذمہ واری اے جو او ٻاہرلے ملک رہݨ آلے پاکستانیاں دی عزت، کارکردگی اتے بہترین ممکنہ خدمت کرݨی اے۔ انہاں وزیراعظم محمد شہباز شریف دی قیادت اچ حکومت پاکستان ولوں کیتی ونجݨ آلی اصلاحات دا خاص طور تے ذکر کیتا جئیں اچ سمندر پار پاکستانیاں کیتے خصوصی عدالتاں دا قیام، بیرون ملک مشناں توں ویڈیو لنک دے ذریعے شواہد دی ریکارڈنگ، مقدمیاں دی ای فائلنگ، بیرون ملک رہݨ آلے پاکستانیاں کوں فائلرز دے طور تے من تے ٹیکسیشن اتے بنکنگ اچ سہولت ݙیوݨ، یونیورسٹیاں اتے میڈیکل کالجاں اچ انہاں دے ٻالاں کیتے مخصوص کوٹہ، پنجاب اتے بلوچستان اچ سہولت دفتران دا قیام، ہوائی اڈیاں تے گرین چینل دی سہولت دی بحالی اتے 126 ملکاں کیتے آوݨ توں پہلے ویزا کیٹیگری دا اجراء شامل ہن۔ سینیٹر اسحاق ڈار کمیونٹی کیتے بلاتعطل خدمتاں کوں یقینی بݨیندے ہوئیں قونصلیٹ دے تاریخی احاطے دی بحالی دا کم مکمل کرݨ تے قونصل جنرل اتے انہاں دی ٹیم کوں سراہیا ۔ ایں موقع تے خطاب کریندیں ہوئیں قونصل جنرل عامر احمد اتوزئی نائب وزیراعظم دی موجودگی اتے رہنمائی تے شکریہ ادا کیتا اتے کمیونٹی دی سہولت کیتے قونصلیٹ ولوں کیتے ڳئے اقدامات دا خاکہ پیش کیتا ۔ انہاں اچ 24 گھنٹے ایمرجنسی ہیلپ لائن دا آغاز، پنجاب لینڈ ریکارڈ دا سک دا قیام، ٹیلی فون ایکسچینج اتے کال مینجمنٹ سسٹم دی اپ گریڈیشن، قونصلیٹ دی نویں ویب سائٹ دا اجراء، نادرا ڈیسک دے ذریعے متعلقہ سہولتاں دی فراہمی، آن لائن پاور آف اٹارنی، آن لائن اپائنٹمنٹ سسٹم، ای کچہری اتے سماجی تے ثقافتی سرگرمیاں شامل ہن۔ نویں سرے توں بݨایا ڳیا قونصلر سروسز ایریا دا افتتاح بیرون ملک پاکستانی کمیونٹی کوں بہترین ممکنہ خدمتاں دی فراہمی جاری رکھݨ دے حکومت دے عزم دا اعادہ کریندے۔
.jpg)
