اسلام آباد۔16ستمبر(اے پی پی)وفاقی وزیر اطلاعات و نشریات عطا اللہ تارڑ آکھیے جو پیغام پاکستان ملک دیاں نظریاتی سرحداں دے دفاع اتے امن دے ودھارے دا ناں اے، امن دے پیغام کوں گھر گھر پڄایا ویسی، ملک اچ دہشت گرداں اتے انہاں دے سہولت کاراں کیتے کوئی ڄاہ کائنی، دہشت گرداں دے سہولت کار وی دہشت گرد ہن، افواج پاکستان دا ملکی سرحداں دے دفاع اچ کردار نہ بھلݨ آلا اے۔ پاک چائنہ فرینڈشپ سینٹر اچ چیئرمین پاکستان علماء کونسل و کوآرڈینیٹر پیغام امن کمیٹی حافظ محمد طاہر محمود اشرفی نال قومی پیغام امن کمیٹی دے پہلے اجلاس نال خطاب کریندے وفاقی وزیر اطلاعات جید علماء کرام اتے غیر مسلم کمیونٹیز دے نمائندیاں ولوں شکریہ ادا کیتا اتے انہاں دی تعریف کیتی جو انہاں ایں اہم قدم دا حصہ بݨݨ تے رضامندی ݙکھائی۔ وفاقی وزیر آکھیا جو پیغام پاکستان پورے ملک اچ واڄح کر ݙتے جو ریاست پاکستان دے خلاف کوئی جہاد نئیں تھی سڳدا کیوں جو پاکستان اسلامی ریاست اے اتے اسلام و شریعت اچ ایںدی کوئی گنجائش کائنی، ایں بارے سارے مکاتب فکر دے علماء کرام دا فتویٰ اے۔ انہاں آکھیا جو پیغام پاکستان وݙی کامیابی نال جاری اے اتے سبز ہلالی جھنڈے دے چٹے حصے دی نمائندگی وی ایںدے اچ شامل اے۔ عطاء اللہ تارڑ آکھیا جو مذہباں وچال ہک آواز ہووݨ دے ودھارے اچ غیر مسلم کمیونٹیز دا کردار سوھݨے لوظاں اچ لکھیا ویسی۔ انہاں آکھیا جو پیغام پاکستان کیتے علماء کرام دیاں وݙیاں قربانیاں ہن، کئی حق آلے عالم ایں سانڳے شہید تھئے جو انہاں دی دہشت گرداں دے خلاف بلند آواز ہئی۔ وفاقی وزیر آکھیا جو اے ملک 27 ویں رمضان دی رات وجود اچ آیا اتے ایں اچ لوکاں دیاں وݙیاں قربانیاں، خون اتے جاناں دے نذرانے شامل ہن۔ وفاقی وزیر آکھیا جو وطن عزیز دے دفاع کیتے ساݙیاں بہادر افواج دیاں وݙیاں قربانیاں ہن، معرکہ حق چ پوری قوم کٹھی تھئی اتے اے پیغام پاکستان ہا جئیں ساریاں کوں طاقت ݙتی۔ انہاں آکھیا جو موجودہ دور اچ ݙو قومی نظریے دی اہمیت ٻئی ودھ ڳئی اے۔ انہاں آکھیا جو پیغام پاکستان دی چھتری ہیٹھ ہک پیغام امن کمیٹی بݨائی ڳئی اے جیںدا مقصد اے ہے جو ملک اچ ڄے تئیں امن قائم نا تھیسی، امن کوں خراب کرݨ آلیاں دا کھل تے ناں نا ڳھدا ویسی اتے دین اسلام دا پیغام گھر گھر نا پڄایا ویسی تاں ڳالھ ادھوری رہ ویسی۔ انہاں آکھیا جو ایں کمیٹی دے ذریعے ملک دی ہر چنݙ ڳٹھ اچ امن دا پیغام پڄایا ویسی، سیمینارز، جلسے اتے جلوس، میڈیا و سوشل میڈیا دے ذریعے ایں پیغام کوں اڳوں ودھایا ویسی۔ عطاء اللہ تارڑ آکھیا جو دہشت گردی دی ایں جنگ اچ قوم 90 ہزار جاناں دے نذرانے پیش کیتن۔ اے ڳالھ صاف اے جو دہشت گرداں دا کوئی رنگ، نسل یا مذہب نئیں ہوندا، اساں ریاست دے دفاع و سالمیت کیتے آخری حد تئیں ویسوں اتے امن دا پیغام ہر ڄاہ پڄیسوں۔ انہاں آکھیا جو اساں ہر ݙینہہ آپݨے جواناں اتے افسراں دیاں لاشاں چیندے ہیں، جو سکولاں دے ٻالاں کوں وی نئیں بخشیندے انہاں دا کوئی دین یا مذہب نئیں تھی سڳدا، اے او عناصر ہن جیڑھے ریاست پاکستان دے خلاف ہن۔ ایںدے اچ کوئی شک نئیں ہووݨا چاہیدا جو دہشت گرداں دا سہولت کار وی دہشت گرد اے۔ انہاں آکھیا جو سارے مکاتب فکراں دے علماء کرام اتے مشائخ عظام ایں تے متفق ہن جو پاکستان اچ دہشت گردی دی کوئی گنجائش کائنی۔ انہاں آکھیا جو پیغام پاکستان دے تسلسل اچ پیغام امن کوں اڳوں ودھایا ویسی، پورے پاکستان اچ ایںدے تے اتفاق پاتا ویندے اتے سکولاں، کالجاں، یونیورسٹیاں اتے ابلاغ دے ذرائع نال ایکوں ودھایا ویسی۔ وفاقی وزیر آکھیا جو پاکستان انشاء اللہ تعالیٰ قیامت تئیں قائم اتے دائم راہسی، ترقی کریسی اتے دہشت گردی دے ناسور کوں اساں سارے رل تے ہمیشہ کیتے مکیسوں۔ انہاں آکھیا جتھاں ساݙیاں بہادر افواج قربانیاں ݙیندیاں پئن اتے دہشت گردی دا مقابلہ کریندیاں پئن۔
.jpg)
.jpg)
