بارباڈوس۔9اکتوبر(اے پی پی)چیئرمین سینیٹ سید یوسف رضا گیلانی بریج ٹاؤن، بارباڈوس اچ جاری68 ویں کامن ویلتھ پارلیمانی کانفرنس (سی پی سی) دے موقع تے برطانیہ دے پارلیمانی وفد نال ملاقات کیتی۔ سینیٹ سیکرٹریٹ توں جاری بیان موجب برطانوی وفد دی قیادت رکن پارلیمنٹ کیٹ اوسامور کیتی، جو کامن ویلتھ پارلیمنٹری ایسوسی ایشن (سی پی اے) دی چیئر اتے لیبر پارٹی نال تعلق رکھیندی اے۔ وفد اچ لارڈ سید صلاح کمال (شیڈو منسٹر صحت، کنزرویٹو پارٹی)، رکن پارلیمنٹ ڈیوڈ منڈیل (کنزرویٹو پارٹی، ایگزیکٹو ممبر CPA) اتے بیرونس لنڈسے نارتھوور (لبرل ڈیموکریٹس) وی شامل ہن۔ پاکستان دی طرفوں سینیٹر روبینہ خالد، سینیٹر محسن عزیز اتے سپیکر سندھ اسمبلی اویس قادر شاہ اجلاس اچ شرکت کیتی۔ملاقات دے دوران چیئرمین سینیٹ سید یوسف رضا گیلانی پاکستان اتے برطانیہ وچال پراݨے اتے کئی پاسوں تعلقات کوں اُجاگر کریندے آکھیا جو کامن ویلتھ پارلیمنٹری ایسوسی ایشن دے فریم ورک دے تحت بین الپارلیمانی تعاون کوں مزید تکڑا بݨاوݨ دی لوڑھ اے۔ انہاں اقوامِ متحدہ دیاں قرارداداں موجب جموں و کشمیر دے عوام دے حقِ خودارادیت دے اصولی موقف کوں واضح کیتا، فلسطین دی موجودہ صورتحال تے ڳالھ کیتی، اتے امن و سلامتی دے عالمی معاملیں، خاص طور تے افغانستان دے حوالے نال بین الاقوامی برادری دے مؤثر اتے مسلسل کردار دی لوڑھ تے زور ݙتا۔ ایں دے نال نال چیئرمین سینیٹ ماحولیاتی تبدیلی دے چیلنجز نال نبڑݨ کیتے مشترکہ عالمی اقدامات دی اہمیت تے وی زور ݙتا۔چیئرمین سینیٹ برطانوی پارلیمنٹ کوں 11 اتے 12 نومبر 2025 کوں اسلام آباد اچ تھیوݨ آلی بین الپارلیمانی سپیکرز کانفرنس اچ شرکت دی باضابطہ دعوت وی ݙتی، جیں اچ دنیا دے پارلیمانی رہنما مشترکہ جمہوری اقدار اتے جدید طرزِ حکمرانی دے چیلنج تے تبادلہ خیال کریسن۔ برطانوی وفد کامن ویلتھ پارلیمنٹری ایسوسی ایشن دے اندر پاکستان دے تعمیری کردار دی تعریف کیتی اتے علاقائی امن، استحکام، اتے تعاون دے ودھارے کیتے پاکستان دیاں کوششاں کوں تعریف دے لائق قرار ݙتا۔ ݙوہائیں فریقاں پارلیمانی ڳالھ مہاڑ کوں اڳوں ودھاوݨ اتے کامن ویلتھ دے جمہوریت، مساوات، اتے شمولیت دے اصولاں کوں مشترکہ طور تے ودھارا ݙیوݨ دے عزم کوں دوہرائے۔
