اسلام آباد۔13 مئی (اے پی پی) وفاقی پارلیمانی سیکرٹری دفاع زیب جعفر آکھیے جو مودی پاکستان توں ہر ڳئے، کوڑ دے پچھوں لکݨ دی بجائے ہار من گھنے ، پاکستان فضائی حدود دی خلاف ورزی تے بھارت کوں ݙوجھی واری سبق سکھائے، او منہ بھر آن ڈٹھے ، جرات، ایمان اتے شہادت دا جذبہ کافراں کنے کائنی، اے ساݙی جت دی بنیاد اے۔ او پارلیمنٹ ہاؤس دے ٻاہروں میڈیا نال ڳالھ مہاڑ کریندیاں پیاں ہن ۔ زیب جعفر آکھیے جو مودی اتے ایندا بھارت ہمیشہ وانڳوں کوڑ دے پچھوں لکدا پئے، مودی نہ صرف عالمی میڈیا کوں کوڑ ماریے بلکہ مسلسل اپݨی عوام کوں وی کوڑ مریندا پئے ۔ انہاں آکھیے جو بھارت تسلیم کرے یا نہ کرے حقیقت اچ او ہر ڳئے دنیا اینکوں ثابت کر چکی اے جو پاکستان ایں جھیڑے اچ بھارت کوں شکست ݙتی، اے پہلی واری کائنی ݙوجھی واری فضائی حدود دی خلاف ورزی تے بھارت کوں ایجھا سبق سکھائے جیڑھا او کݙاہیں نہ بھلسی۔ انہاں بھارتی میڈیا کوں مخاطب کریندے آکھیے جو او کݙاہیں تاں سچ ٻولن، انہاں دے کوڑے ہووݨ تے عالمی میڈیا و عالمی برادری مہر ثبت کر چکے۔ انہاں آکھیے جو پاکستان دی بہادر افواج بھارت دے جنگی طیارے ڈھائے، ارباں دا دفاعی ساز و سامان ناکارہ بݨا ݙتے۔ پارلیمانی سیکرٹری آکھیے جو پاکستان دے 25 کروڑ عوام مسلح افواج کوں ایں تاریخی جت تے مبارخ ݙیندن، ساݙی مسلح افواج گھر اچ وڑ تے دشمن دی ہر طرح دی جارحیت دا جواب ݙتے، پاکستان ہر ویلھے دشمن دی سلھ دا جواب پتھر نال ݙیوݨ سانڳے تیار اے۔
.jpg)
