ڈھاکہ۔22اگست (اے پی پی) وفاقی وزیرِ تجارت جام کمال خان بنگلہ دیش دے مشیر تجارت شیخ بشیر الدین نال ڈھاکہ اچ ملاقات کیتی۔ جاری پریس ریلیز موجب ملاقات اچ ݙو طرفہ تجارتی تعلقات کوں ودھارا ݙیوݨ، سرمایہ کاری ودھاوݨ اتے اقتصادی تعاون کوں مستحکم بݨاوݨ تے تفصیلی ڳالھ مہاڑ کیتی ڳئی۔ ملاقات اچ ݙوہیں ملکاں سانجھے تجارتی تعلقات کوں ادارہ جاتی فریم ورک دے تحت اڳوں ودھاوݨ تے اتفاق کیتا ڳئے۔ ایں سلسلے اچ پاکستان اتے بنگلہ دیش سانجھا ورکنگ گروپ برائے وپار قائم کرݨ اتے 2005 دے بعد غیر فعال رہݨ آلے سانجھے اکنامک کمیشن کوں ول فعال کرݨ دا فیصلہ کیتا۔ ایں توں انڄ ، ہک سانجھا ٹریڈ کمیشن بݨاوݨ تے وی اتفاق کیتا ڳئے، جیڑھا مستقبل دے تجارتی روڈ میپ اتے مقاصد طے کریسی۔ ݙوہیں رہنماواں زرعی نویں ٹیکنالوجی، قابلِ تجدید توانائی، سٹیل انڈسٹری، شپ بلڈنگ، گرین شپ بریکنگ، حلال ٹریڈ، پنڈوں، چاول، معدنیات، چمڑے، شوگر، ڈیہائیڈریٹڈ فروٹس اتے ایگرو پروسیسنگ سودھے کئی شعبیں اچ تعاون دے امکانات تے ڳالھ مہاڑ کیتی۔ ملاقات اچ اے وی زور ݙتا ڳئے جو ݙو طرفہ وپار کوں ودھارا ݙیوݨ کیتے لاجسٹکس اتے کنیکٹیوٹی کوں بہتر اتے گھٹ لاڳت بݨایا ونڄے۔ ٹیرف اتے ڈیوٹیز اچ گھٹکی دے نال نال کجھ بنگلہ دیشی مصنوعات کوں پاکستانی مارکیٹ تئیں ترجیحی رسائی ݙیوݨ دے معاملے تے وی ڳالھ تھئی۔ فریقین ایں ڳالھ تے اتفاق کیتا جو پاکستان اتے بنگلہ دیش وچال تجارتی گنجائش ٻہوں زیادہ اے، جیں توں ݙوہیں ملکاں دے عوام براہ راست فیدہ چا سڳدن۔
.jpg)
