امت مسلمہ آپݨی اقدار اتے اسلامی اصولاں تے عمل کر تے اقوام عالم اچ ونڄیا مقام ولا ڳھن سڳدی اے، وزیراعظم شہباز شریف دا ملائیشیا دی یونیورسٹی اچ اعزازی ݙگری گھنݨ دی تقریب توں خطاب

کوالالمپور۔7اکتوبر (اے پی پی) وزیراعظم محمد شہباز شریف آکھیا جو امت مسلمہ آپݨی اقدار اتے اسلامی اصولاں تے عمل کر تے اقوام عالم اچ ونڄیا مقام ولا ڳھن سڳدی اے۔  قیادت کوئی امتیاز نئی بلکہ امانت اے، قیادت کوں دیانت، اخلاص، عدل اتے شفاف احتساب نال ادا کرݨ ضروری اے، خواہش اے جو پاکستان اتے ملائیشیا وچال علمی تعاون ٻیا مضبوط تھیوے، ݙوہیں برادر ملک نینگر آبادی نال مالا مال ہن، اساݙی ذمے واری اے جو آپݨے نینگریں کوں انسانیت دی خدمت کیتے موقعے فراہم کروں۔ اے ڳالھیں انہاں منگل کوں اتھاں ملائیشیا دی انٹر نیشنل اسلامک یونیورسٹی ولوں پی ایچ ڈی (ڈاکٹریٹ) لیڈرشپ اینڈ گورننس دی اعزازی ݙگری ݙیوݨ دی تقریب توں خطاب کریندیں ہوئیں کیتی۔تقریب اچ ملائیشیا دی ریاست پہانگ دی ملکہ اتے بین الاقوامی اسلامی یونیورسٹی آف ملائیشیا دی آئینی سربراہ تنکو عزیزہ امینہ میمونہ سکندریہ، ملائیشیا دے وزیر برائے اُوچی تعلیم داتو سری راجا ڈاکٹر زیمبری عبدالقادر، ملائیشیا دے وزیر مواصلات داتو احمد فہمی محمد فاضل، ملائیشیا دی بین الاقوامی اسلامی یونیورسٹی دے صدر تان سری عبدالرشید حسین اتے ریکٹر پروفیسر عثمان باقر دے علاوہ پاکستانی وفد دے ارکان وی موجود ہن۔وزیراعظم آکھیا جو بین الاقوامی اسلامی یونیورسٹی آف ملائیشیا توں ڈاکٹریٹ دی اعزازی ݙگری میݙے کیتے باعث اعزاز اے، بین الاقوامی اسلامی یونیورسٹی ملائیشیا جیڑھی عظیم علمی درسگاہ توں لیڈرشپ اتے گورننس اچ ڈاکٹریٹ دی اعزازی ڈگری عاجزی نال گھندا پیاں، بین الاقوامی اسلامی یونیورسٹی آف ملائیشیا علم تے دانش دا مرکز اے، اے عظیم درسگاہ علم، ایمان اتے اخلاق کوں رَل ا تے اُوچی تعلیم دے مقصد کوں اڳوں ودھیندی پئی اے۔ وزیراعظم آکھیا جو انہاں 40 سال توں ودھ ویلھے تئیں آپݨی عاجزانہ خدمات کوں پنجاب دی عوام کیتے وقف کیتا، پنجاب پاکستان دا ساریاں توں وݙا صوبہ اے۔ او اتھاں بطور عوامی خدمت گار آپ کوں وقف کیتے رکھیا اتے ہݨ بطور وزیراعظم پاکستان دے عوام دی خدمت کیتے آپݨی ذمے واریاں نبھینداں پیاں۔ وزیراعظم آکھیا جو انہاں پوری ایمانداری اتے غیر متزلزل عزم نال عوام دی خدمت کرݨ دی بھرپور کوشش کیتی اے، ہمیشہ خلوص نیت اتے ثابت قدمی نال عوام دی خدمت کرینداں، اڄ عاجزی نال اللہ سبحان و تعالٰی دے حضور سِر جُھکا تے ایں اعزاز کوں دلی شکریے نال قبول کرینداں۔ وزیراعظم آکھیا جو میکوں واقعی بہوں خوشی اے جو ایں ڈگری دے ذریعے میں ہک ایہو سویں عظیم درسگاہ نال جُڑدا پیاں جو مسلم دنیا اچ بطور مادر علمی ساریں توں ودھ قابل احترام اے، میں امید کرینداں جو میݙی اتھاں موجودگی بین الاقوامی اسلامی یونیورسٹی آف ملائیشیا اتے پاکستان دی معروف اُوچی تعلیمی درسگاہاں وچال تعلیمی شراکت اتے تعاون کوں مضبوط کریسی، مسلم دنیا دی ہک معزز ترین درسگاہ نال جُڑݨ میݙے کیتے باعث اعزاز اے۔ وزیراعظم آکھیا جو قیادت کوئی اعزاز نئی بلکہ مقدس امانت اے جو ایمانداری، خلوص، انصاف اتے شفاف احساس جواب دہی نال ادا کیتی ونجݨی چاہیدی اے۔ وزیراعظم آکھیا جو تاریخ گواہ اے جو جݙاں وی مسلماناں انہاں شاندار اصولاں کوں مضبوطی نال پکڑیا، انہاں نہ صرف خود ترقی کیتی بلکہ پوری دنیا کیتے رہنمائی دا ذریعہ وی بݨے۔ وزیراعظم آکھیا جو اڄ مسلم اُمہ کوں تنازعیاں، غربت اتے آپسی انتشار جیڑھے بے پناہ چیلنجاں دا سامݨا اے، انہاں اوکھے حالات اچ اساں کوں آپݨی انہاں اقدار اتے اخلاقیات کوں مضبوطی نال پکڑ تے رکھݨ دی لوڑھ اے جنہاں دی اساݙے دین اسلام تعلیم ݙتی اے تاں جو اساں اقوام عالم اچ آپݨا ونڄیا مقام ولا حاصل کر سڳوں۔ وزیراعظم آکھیا جو خواہش اے جو پاکستان اتے ملائیشیا وچال علمی تعاون مضبوط تھیوے، ایں عظیم اتے برادر ملک اساݙے ݙوجھے گھر ملائیشیا وانڳوں پاکستان کوں وی اللہ تعالیٰ نینگریں نال مالا مال کیتا ہوئے، بطور خدمت گار اتے رہنما اے اساݙی ذمے واری اے جو اساں انہاں کوں ٹھیک پلیٹ فارم فراہم کروں تاں جو ہمدردی اتے زبردست عزم نال او ݙُکھی انسانیت دی خدمت کر سڳن۔ وزیراعظم آکھیا جو اساݙے عظیم شاعر مشرق تے فلسفی ڈاکٹر علامہ محمد اقبال دے لازوال لفظ یاد آندے ہن جنہاں دا وژن نہ صرف پاکستان دی عوام بلکہ پوری دنیا دے مسلماناں کیتے متاثر کن اے۔ انہاں دا شعر ہے جو ’’سبق پھر پڑھ صداقت دا عدالت دا شجاعت دا ۔۔۔لیا ویسی تُس توں کم دنیا دی امامت دا‘‘۔ وزیراعظم آکھیا جو میری دعا ہے جو اے عظیم جامعہ بین الاقوامی اسلامی یونیورسٹی آف ملائیشیا کامیابی دیاں منزلاں تسلسل نال طے کریندی راہوے، ݙوہائیں عظیم ملکاں پاکستان اتے ملائیشیا کیتے اتحاد، بھائی چارے، ترقی اتے خوشحالی کیتے گہرے تعاون کیتے وی دعا گو ہاں، پاکستان اتے ملائیشیا دی دوستی ہمیشہ قائم راہوے، اعزازی ݙگری عطا کرݨ تے یونیورسٹی دے صدر، چانسلر، ریکٹر، وزیر تعلیم، فیکلٹی ممبران اتے طالب علماں دا شکر گزار ہاں۔ ایں موقع تے ملائیشیا دی ریاست پہانگ دی ملکہ اتے انٹر نیشنل اسلامک یونیورسٹی آف ملائیشیا دی آئینی سربراہ تنکو عزیزہ امینہ میمونہ سکندریہ آکھیا جو وزیراعظم محمد شہباز شریف کوں قیادت اتے طرز حکمرانی اچ اعزازی (ڈاکٹریٹ) ݙگری عطا کرݨ میݙے کیتے اعزاز اے۔ انہاں چار ݙہاکیاں توں ودھ ویلھے تئیں بصیرت، نظم و ضبط اتے رحم دلی نال عوام دی خدمت کیتی اے اتے پنجاب دی قیادت توں گھن تے ملک دی وزارت عظمٰی تئیں ثابت کیتے جو اصل قیادت طاقت نئی بلکہ مقصد نال ہوندی اے۔ انہاں آکھیا جو وزیراعظم شہباز شریف دے پنجاب ایجوکیشن انڈوومنٹ فنڈ دے سویں اقدامات نال ہزاراں ایہو جیھیاں طالب علماں کیتے اُوچی تعلیم دے دروازے کھول ݙتے ڳئے جو کݙاہیں یونیورسٹی ونجݨ دا تصور وی نہ کر سڳدے ہن، اے او قیادت اے جو دل کوں چھوندی اتے مستقبل کوں بہتر بݨیندی اے، اڄ دے دور اچ جݙاں دنیا ظاہری شان تے شوکت کوں اخلاقیات تے ترجیح ݙیندی اے، تہاݙی قیادت اساں کوں یاد ݙویندی اے جو چنڳی حکمرانی خلوص، خدمت اتے مضبوط کردار دا ناں اے۔ انہاں آکھیا جو نبی کریم صلی اللہ علیہ وسلم دا فرمان اے جو تساں اچ ساریں توں بہترین او ہے جو ٻئیاں کیتے ساریں توں ودھ فائدہ مند ہووے۔ انہاں آکھیا جو پاکستان ہک لمبے ویلھے توں ملائیشیا دا برادر ملک اتے آئی آئی یو ایم دا بانی شراکت دار اے اتے وزیراعظم شہباز شریف دی قیادت اچ اے رشتہ ٻیا مضبوط تھیے، اڄ اساݙے پاکستانی طالب علم، استاد اتے سابق طالب علم یونیورسٹی کوں مسلسل علمی تے فکری طور تے مالا مال کریندے پئن اتے مسلم اُمہ دی خدمت دے اساݙے مشترکہ مشن دی خدمت کریندے پئن۔ انہاں آکھیا جو اے اعزازی ݙگری محض ہک کامیابی دا اعتراف نئی بلکہ ایں توں ودھ انہاں اقدار دا جشن اے جنہاں کوں اساں عزیز رکھیندن اتے جو عدل، خدمت اتے رہنمائی ہن۔ انہاں آکھیا جو اساں دعا گو ہاں جو اے اعزاز اساݙے کیتے اللہ سبحان و تعالٰی دی برکتاں اتے ہدایت دے نال ہووے تاں جو زمین تے امن اتے انسانیت اچ ہم آہنگی قائم تھیوے۔ ایں توں پہلے ملائیشیا دی ریاست پہانگ دی ملکہ اتے انٹر نیشنل اسلامک یونیورسٹی آف ملائیشیا دی آئینی سربراہ تنکو عزیزہ امینہ میمونہ سکندریہ وزیراعظم محمد شہباز شریف کوں پی ایچ ڈی (ڈاکٹریٹ) لیڈرشپ اینڈ گورننس دی اعزازی ݙگری ݙتی۔